LAI tau dunsanak bahwa satiok 20 Februari diparingekan sebagai Hari Sosial Sedunia. Tanggal iko dikatoan pado November 2007 untuak pariode 62 sidang taunan Majelis Umum PBB. Keadilan sosial adolah hak bagi satiok warga negara Indonesia yang hiduik basamo di negara kito iko. Palakuan hukum yang indak mambedakan antaro golongan ateh maupun golongan bawah, sadoe masyarakaik berhak dan samo untuak mandapekan hukum nan adia dan sataro jo nan lainnyo. Dengan baitu keadilan bisa disamokan dengan nilai-nilai dasar sosial.
Di Minangkabau ado pepatah mangatoan, “adaik yang bacupak bagantang” artinyo adolah salah satu asas yang pantiang dalam kehidupan bermasyarakaik di Minangkabau samo seperti halnyo adaik yang bajanjang naiak batanggo turun dan adaik babarieh-babalabeh. Adaik bacupak jo bagantang ko adolah adaik nan maatur tantang katantuan-katantuan hukum ma hukum di dalam korong jo kampuang, sampai ka koto jo nagari, kok tumbuah silang sangketo atau pun cakak jo kalahi. Tantu falsafah iko cocok bagi kito kaum laki-laki karano kito nan akan mamimpin kamanakan kito untuak kemudian hari.
Adaik nan bacupak bagantang lebih bakaitan jo sila kalimo dalam Pancasila yaitu Keadilan Sosial Bagi Seluruh Rakyat Indonesia. Kalau kito mambahas tentang keadilan berarti kito membahas tentang sistem pamarintahan nan ado di Minangkabau. Dalam hal iko sistem pemerintahan nan adia didalam masyarakaik Minangkabau arek hubunganyo jo asas adaik nan bacupak bagantang. Pangaratian cupak dan gantang pado dasarnyo merujuak pado sabuah ukuan atau timbangan nan digunoan dalam mangukua suatu hal, sahinggo sesuai jo harapan sadoe lapisan masyarakaik. Mukasuiknyo yaitu pas, indak kurang dan indak labiah. indak barek sabalah pado kepentingan tatantu sehinggo manguntungan sakalompok urang sajo.
Dalam kahidupan sahari-hari, arti nan labiah dan kurang dipahami “labiah untuak kapantingan pribadi” dan “kurang untuak kapantingan umum” atau kapantingan urang lain. Istilah mode ko tantu bisa dikatoan indak adia, karano indak sasuai jo prinsip keadilan sosial nan balaku dalam masyarakaik Minang. Hal mode iko babeda berbeda jo adaik nan bacupak bagantang yaitu asas nan balandasan prinsip keadilan bagi masyarakaik nan takanduang dalam pancasila yaitu sila kalimo.
Adaik bacupak bagantang sangaik arek kaitannyo dengan pamimpin. pamimpin di Minangkabau disabuik “urang nan ampek jinih”, yaitu pangulu, manti, malin, dan dubalang. Dari kaampek ko kito baraja mana tau kito manjadi salah satu nyo. Kito hiduik dalam bamasyarakaik tantu punyo pamimpin. Misalnyo apobilo kito manjadi pamimpin di Minangkabau tantunyo kito mampunyoi cupak tasandiri dalam diri kito cupak iko nan paratamu tantunyo cupak usali yaitu cupak yang didasarkan pado diri kito maksudnyo hati kito, kama kato hati itulah nan sabananyo. Nan kaduo yaitu cupak buatan maksudnyo cupak atau ukuran nan disasuaian jo kapantingan masyarakaik agar taciptanyo keadilan sosial bagi sadoe lapisan masyarakaik. Cupak buatan ko tantu kito sebagai pamimpin harus malaksanakanyo karano demi kapantingan basamo di dalam masyarakaik, walaupun indak sasuai jo hati kito tantu kito harus manuruik kaputusan basamo didalam masyarakaik kito.
Jadi apobilo kito manjadi pamimpin atau indak kito harus malakuan keadilan sosial ko, karano untuak mambuek keadilan manuruik hemat panulih tantu barawal dari diri kito salanjuiknyo baru kito laksanokan dalam kahidupan kito dalam bamasyarakaik. Tantu kito harus sadar dulu dalam diri kito untuak adia dalam bamasyarakaik, indak mambedakan iko urang miskin, kayo, warna kulik nyo dan lain sebagainyo.
Keadilan sosial ko sasuai jo Pancasila. Karano Pancasila ko sasuai pulo jo kahidupan bamasyarakaik di Minangkabau. Contohnyo sajo sila patamu tantu katuhanan yang maha eso artinyo kito urang minang tantu urang Islam karano sasuai jo falsafah adaik basandi syara’, syara’ basandi kitabullah. Tantu sila kalimo sasuai juo karano ado juo keadilan sosial dalam bamasyarakaik di Minangkabau tantu kito taraukan karano kito akan maadokan masalah-masalah baiak di rumah maupun kito dalam bamasyarakaik di kampuang kito. Manuruik hemaik panulih keadilan sosial ko bahubungan jo hubungan sosial kito di tengah masyarakaik apobilo kito indak bana manjadi pamimpin satidaknyo kito mamimpin kamanakan kito, bini kito, adiak kito, dan lainnyo.
Jadi manuruik hemat panulih tantu rancak pulo tanggal 20 februari ko diparingati sebagai hari keadilan sosial ko karano keadilan ko adolah hal yang payah juo dilakuan dek kito kalau kito indak manaraukannyo karano barawa dari diri kito surang-surang. Manuruik hemaik panulih falsafah adaik bacupak jo bagantang ko tantu bahubungan arek jo paringatan hari keadilan sosial ko, baiak kito sebagai pamimpin tantu kito harus adia dalam kahidupan, indak barek sabalah. Kito sebagai warga biaso tantu berhak pulo untuak mandapekan keadilan dari pamimpin kito. Karano keadilan akan manimbuekan masyarakaik nan patuah jo norma sarato hukum yang balaku dalam nagari kito. Jadi untuak kadapannyo bausaho lah kito adia kapado saluruah lapisan masyarakaik.
Salamaik hari keadilan sosial sadunia dari panulih pado tanggal 20 Februari ko. (*)
Penulis adalah Abdul Jamil Al Rasyid mahasiswa Sastra Minangkabau FIB Unand angkatan 2019 berdomisili di Padang Pariaman Santri Pondok Pesantren Madinatul Ilmi Nurul Ikhlas Patamuan Tandikek
