Oleh: SW. Dt. Sutan Siri Batuah
SEBAGAI orang Minang wajib tahu di nan ampek, yaitu kato manurun, kato madata, kato malereng jo kato mandaki.
Kato manurun adolah caro batutua kato bake nan labiah ketek, kato mandata adolah caro batutua kato jo nan samo gadang, kato malereng adolah caro batutua kato ka Sumando, Ipar, Besan baiak nan labiah tuo atau labiah mudo.
Sedangkan kato mandaki adolah caro batutua kato bake urang tuo atau urang nan dituokan, karano itu Urang Minang mangenal nan namonyo ‘Sawah iyo bapamatang’. Artinyo dalam bakomunikasi ado bateh-bateh nyo.
Urang Minang sangat manjago bateh bateh tu. Baa praktek nyo bilo dalam sebuah pertemuan ado urang nan ketek, ado nan tuo, ado sumondo ipar besan dan ado niniak mamak jo kamanakan? Mako disitulah urang minang mangenal nan namonyo ereng jo gendeng, alua jo patuik sahinggo dikenal pulo lah nan namonyo biliak ketek jo biliak godang.
Walaupun sacaro alua urang nan tuo indak salah mamakai kato manurun kapado nan ketek, tapi bilo disitu ado ipar besan jo urang samo godang mako ado ‘patuik’ nan harus ditimbang. Indak patuik urang nan tuo manasehati nan mudo di muko kawan-kawannyo apolai marondahkannyo.
Walaupun sacaro alua urang samo godang indak salah mamakai kato mandata ka kawan bagurau nyo, tapi bilo disitu ado urang tuo jo niniak mamak mako ado pulo ‘patuik’ nan harus ditimbang.
Itulah makonyo urang minang mamiliah miliah tampek untuak bakumpua. Jarang sekali kito temukan mamak jo kamanakan duduak di kodai nan samo. Bilo dalam kadai tu la duduak mamaknyo mako kamanakan mamiliah lopau nan lain utk minum. Tapi, zaman barubah tapian pindah. Jalan dialiah dek
urang lalu.
Kini urang indak lai bakumpua di balai, urang maota indak lai di kadai, mangaji indak pulo lai di surau. Urang kini bakumpua jo maota di dunia maya namonyo. Antah itu sabagai balai, antah itu sebagai kadai antah itu sebagai surau. Lah bacampua jadi satu.
Banyak elok jo manfaat nan didapek tapi totap ado juo buruaknyo. Kini baa caronyo maagiahnyo pamatang? Disiko lah parolunyo niniak mamak, alim ulama jo codiak pandai manduduakkannyo. Nan tuo maagiah contoh ka nan mudo, nan tahu maingekkan nan lupo.
Dek lah dulu lalang tumbuah pado padi, iyo ciek disiangi ka ubek nyo. Kini group-group WA lah tumbuah bak cindawan katiko
hujan. Ado group ketek ado group godang. Ado group khusus ado pulo group umum. Kadang-kadang anggotanyo indak mamandang umua jo jabatan, indak penting posisi jo kedudukan, tuo mudo, laki padusi godang ketek manjadi satu. Itulah kenyataan nan ndak bisa disalahkan.
Lalu baa solusinyo supayo sawah tetap bapamatang, paek indak mamakan baris, jan rusak susu dek nila? Mako kok iyo la tasosek jalan diujuang marilah kito baliak ka pangka.
Ado duo jalan nan lah digariskan den urang tuo sarupo nan lah disampaikan. Partamo ereng jo gendeng, alua jo patuik harus dipatimbangkan. Kok sulik mako ambiaklah jalan kaduo bueklah biliak ketek jo biliak godang. Pulang maklum anggota tontang itu.
